有家長問過⋯⋯

兒子 predict grade 中文得2級，其他科3級。佢因為病過，記憶力比以前差，我好擔心佢嚟緊呢年點算⋯⋯

 
劉sir教室回答

多謝你咁信任我，願意同我分享呢份擔憂。老實講，呢個成績表，睇落「平均」，但背後反映嘅係一個好現實嘅問題——以佢而家嘅時間分配，每科平均每星期得四個鐘甚至更少，根本唔夠時間將每一科準備得全面。 所以呢個成績，唔係「唔勤力」，係「時間唔夠用」嘅自然結果。

特別係物理呢科，佢嘅性質係一落後就好難追返。佢而家Keep到3級，其實已經好唔容易——呢個係佢付出咗好多努力嘅成果 。

但如果目標係要上到5級，以而家嘅時間分配嚟講，老實講，真係會好困難。唔係佢唔得，係「時間唔容許」。

記憶力方面，其實DSE好多科考嘅唔係「死記」，而係「概念連結」同「答題框架」和「邏輯鏈應用」——呢啲正正係可以透過有系統嘅訓練去補足嘅。所以唔使太擔心佢嘅記憶力問題，我哋可以用啱嘅方法去幫佢繞過呢個障礙。

所以我建議一個同而家完全相反嘅策略——唔好平均分配時間，而係「跟住目標去分配溫習比重」。即係：

·  物理——如果唔係你哋嘅目標拉分科，目標set喺4級，咁就會釋放好多時間出嚟俾其他科；

·  Chem——要拎5級，其實唔算太難，係投資回報比最高嘅一科；

·  Math——要睇吓嚟緊呢一年佢嘅諗嘢速度有冇突破，呢科需要時間浸；

·  中文——短時間內要大爆發，坦白講，機會唔大。但如果Keep住進度，到中六時捉題目、背答題框架，仍然有望拉返上去。

你同佢商量吓：邊科係你哋最想「保住」嘅？邊科係「可以放輕少少」嘅？ 暑假如果可以咁樣重新排列優先次序，到開學之後，佢就唔使好似而家咁——成日都好似救火咁，頭痛醫頭、腳痛醫腳，搞到兩頭唔到岸。我都心痛佢咁辛苦。

老實講，佢經過呢一年，其實進步咗好多。但最大嘅進步阻力，係佢真係太忙。如果時間運用唔改變，要大突破，佢會好辛苦——我真係好想幫佢行得順啲。

你同佢傾完之後，再話我知佢嘅意願，我哋再一齊調整溫習策略 。 麻煩晒你！